பிசினஸ் என்பது வியாபாரம். வாங்கிய விலைக்கும் விற்கும் விலைக்கும் இடையில் இருப்பது இலாபம் என்று சொல்லலாம். ஆனால் உண்மையில் அங்கிருப்பது ஒரு பொய். பையிங் ரேட்டே 50 டாலர் சார் என்பது முதல் சர்விஸ் சார்ஜ் தவிர மற்றதெல்லாம் நெட் டூ நெட் ரேட் சார் என்பது வரை ஒரு நாளில் எவ்வளவு பொய்கள். பொய் சொன்ன வாய்க்கு போஜனம் கிடைக்காது என்பார்கள். ஆனால் பொய் சொல்லித் தான் போஜனம் செய்ய விதித்திருக்கிறது.

 

இங்கே வாங்கிய விலை சொல்லி விற்பதுமில்லை. விற்கும் விலை சொல்லி வாங்குவதுமில்லை. இப்ப தான் பறிச்ச தோட்டத்து காய் என்பது முதல் இன்னைக்கு மட்டும் 20% டிஸ்க்கவுண்ட் என்பது வரை தினமும் பொய்களை சொல்லியும் கேட்டும்...இந்த வேலையை தான் ஆங்கிலத்தில் பிஸினெஸ் என்று பெருமையாய் சொல்லிக் கொள்கிறோம். பண்டமாற்று முறையிலிருந்து 'விற்றல் வாங்குதல் முறைக்கு' நம்மை இட்டுச் செல்வதற்காக கண்டுபிடிக்கப் பட்டதே நாணயம்.

 

ஆனால் இந்த முறைக்கு நாணயம் என்று பெயர் வைத்தவன் பெருஞ்சிரிப்பு ஒன்றை சிரித்திருக்கக் கூடும். நாணயம் என்ற ஒன்றை - இனி எவரும் கடைப்பிடிக்க முடியாத முறை ஒன்றை அறிமுகப்படுத்தி அதற்கு 'நாணயம்' என்று பெயர் வைத்தவன் சிரிக்காமல் என்ன செய்வான். கருப்பாய் இருக்கும் ஒருவனுக்கு வெள்ளைச்சாமி என்று பெயர் வைப்பதைப் போல இது ஒரு முரண்.

 

பல் வலி வந்த ஒரு நாள் இப்படியெல்லாம் சிந்திக்க வைத்தது. எந்த பொய் சொன்னதால் இந்த வலி வந்திருக்கும் என பல வித யோசனைகள். உடம்பிற்கு எது வந்தாலும் அதனை பாவ புண்ணிய காரியங்களோடு சம்பந்தப்படுத்தும் இந்த நடுத்தர வர்க்க மனசு இப்படித் தான் யோசிக்க வைத்தது. அது சரி. பொய் சொன்னதெற்கெல்லாம் பல் வலி வந்தால் இந்நேரம் மொத்தப் பல்லும் விழுந்திருக்க வேண்டும் என இன்னொரு மனசு அதனை ஆறுதல் படுத்தியது.

 

எதனால பாப்பா இப்பிடி இன்பெக்ஷன் ஆச்சு என்றதற்கு மகள் சொன்னது.. வயசாகுதுல சித்தப்பா. இந்த ஒற்றை வார்த்தை இனி பெறுவன வற்றிலிருந்த்து விடுவன வற்றை நோக்கி செல்ல வேண்டியதன் பொருளுணர்த்தியது. அன்பும் ஆதரவுமான வார்த்தைகளைச் சொல்லும் மகள் கையால் பல் பிடுங்க பாக்கியம் செய்திருக்க வேண்டும். என்ன ஒரு வலி! உடலில் இருந்து உயிர் பிரிந்தால் இப்படித் தான் வலிக்கும் போல அப்பிடி ஒரு வலி. பார்த்துப் பார்த்து மகள் பிடுங்கியதே இப்படி வலிக்கும் என்றால் மற்றவர் கையால் பிடுங்கியிருந்தால் பெருங்குரலில் அழுத்திருப்பேன். என்ன சித்தப்பா ரொம்ப வலிச்சிருச்சா என்ற மகளிடம் சொன்னேன். சித்தப்பாவால வலி தாங்க முடியாதுடா என..

 

என் ஏகலைவன் சித்தப்பா புண்ணியத்தில் சென்னை வந்த நாள் முதல் இந்நாள் வரை வாழ்க்கை பெரும் வலி ஏதுமின்றி ஓடிக் கொண்டிருக்கின்றது. இந்த பல் வலியும் இனி வராமல் பார்த்திட இறைவன் உதவுவாராக. இறுதியாக,  நோய் நாடி நோய் முதல் நாடி மருத்துவம் பார்க்கும் என் மகளுக்கு எந்தக் குறையும் இல்லாத வாழ்க்கை வளமாக அமையட்டும்.         

 

சிகப்பு கலர் பர்சும் ஸ்விக்கி சரணும் 

 

இன்று அலுவலகம் செல்வதற்காக தாம்பரம் இரயில் நிலையத்திற்கு வரும் போது ரோட்டில் ஒரு சிகப்பு கலர் மணி பர்ஸ் விழுந்து கிடப்பதை பார்க்கின்றேன். அதே நேரத்தில் மூன்று நபர்களும் இதனை பார்க்கின்றனர். ஸ்விக்கி டெலிவரி பையன் (சரண் என்பது அந்த நல்லவனின் பெயர்). இரண்டு அரவாணிகள்

இரண்டு அரவாணிகளின் ஒருவர் அந்த பர்ஸை எடுத்து,  இந்தா பார் ..உனது பர்ஸ் கீழே விழுந்து விட்டது என்று நாடகமாட அந்த நாடகம் எங்கள் இருவரின் தலையீட்டால் தடுக்கப் படுகின்றது.

இது உங்கள் பர்ஸ் இல்லை. பஸ்ஸில் இருந்து கீழே விழுந்ததை நான் பார்த்தேன் என்று சரன் சொல்லவும் அதனை அவனிடமே கொடுத்து விட்டு செல்கின்றனர்.

இப்போது அந்த பர்ஸை உரியவரிடம் சேர்க்கும் பொறுப்பு எங்களுடையதாகின்றது. பர்சில்  போன் நம்பர் இருந்தால் அழைத்து கொடுக்கலாம் என்று திறந்தால் அதில் மூன்று ஐநூறு ரூபாய் நோட்டுக்கள் மற்றும் சில்லறைகள். ஒரு பழைய நைந்து போன விசிட்டிங் கார்டு. அதில் ராம் என்று இருந்தது. அந்த 'ராமை'அழைத்தோம். என் அம்மாவின் பர்சாக அது இருக்கலாம் என்று சொன்னவர் சிறிது நேரத்தில் மீண்டும் அழைத்து அது  அவரோடது இல்லை என்றார்.

இன்னும் ஒரு துண்டு சீட்டும் அதில் இரண்டு நம்பர்களும் கிடைத்தன. வைஷ்ணவி என்று எழுதப் பட்ட ஒரு எண்ணிற்கு அழைத்தோம். என்னது .. பர்ஸ் ஆ. உனக்கு எப்படி இந்த நம்பர் தெரியும். போன வை என்று துண்டிக்கப் பட்டது . இன்னொரு எண்ணிற்கு அழைப்பு செல்லவில்லை. மீண்டும் அந்த வைஷ்ணவியை  அழைத்தோம். இந்த பாரு..நீ சொல்றதுல நம்பிக்கை இல்ல. அப்டி அக்கறை இருக்கிறவன் போலிஷ் ஸ்டேஷன் ல குடுத்துட்டு உன் வேலைய பாத்துட்டு போக வேண்டியது  தான என்றார்.

அக்கா..அவங்க மேல நம்பிக்கை இருந்தா நாங்க ஏன் அரை மணி நேரமா இந்த வேலைய பாத்திட்டு இருக்கோம் என்று சொல்லும் போதே அழைப்பு துண்டிக்கப் பட்டது. அக்கா நம்பரை ஸ்டோர் பண்ணி கடைசி முயற்சியாக அந்த துண்டு சீட்டை வாட்சப்  பண்ணினோம்.

மீண்டும் அழைத்த போது ...இங்க பாரு இந்த நம்பரே போலிஷ் டி எஸ் பி நம்பர் தான். அவர் தூன்கினு இருக்காரு..என்ன போட்டோ லாம் வாட்சப் பண்ற. அவ்ளோ தான் பாத்துக்க ..இனி நீ அவரோட தான் பேசணும் என்றார். அக்கா என்னோட நோக்கம் தப்பா இல்ல..அதனால பயப்பட மாட்டேன். இந்த சீட்ல உங்க பேர் எழுதி இருக்கு நம்பரோட..யாரொ தெரியாதவங்க எழுதி வச்சிருக்க போறதில்ல. உங்களுக்கு ஞாபகம் வந்தா எனக்கு கால் பண்ணுங்க என்று அழைப்பை துண்டித்தோம்.

சரி தம்பி எனக்கு ரொம்ப நேரமாச்சு.. நான் கிளம்புறேன் என்று சொல்லி விட்டு வண்டியை  ஸ்டார்ட் செய்தால் சரண்… அண்ணா விட்டுட்டு போறீங்களே என்றான். நீ எந்தூரா ..தூத்துக்குடினா  .

 எனக்கு மதுரை டா ..வேலை நிறைய இருக்குடா ..பர்சை பார்த்தால் அது கஷ்டப்படுபவர் கையில் இருந்து தான் தவறி இருக்குனு தெரியுது..ஆனா தொலைத்தவருக்கு இங்கு தான் அது விழுந்திருக்கும் னு  தெரியாதே..

சரினா நான் இன்னும் ஒரு அரை மணி நேரம் வெயிட் பன்றேன்னு சொன்னவனிடம் போன் நம்பரை வாங்கிக் கொண்டு அலுவலகம் வந்தேன். சோசியல் மீடியாவில் பரப்புவோம். இரண்டு நாட்களில் யாரும் வரவில்லை என்றால் போலிஷ் ஸ்டேஷன் சென்று ஒப்படைப்போம் என்று முடிவு செய்திருந்தோம்  

ஏழு மணிக்கு வைஷ்ணவி அக்காவிடமிருந்து அழைப்பு. தம்பி ..அந்த பர்ஸ் எங்க வீட்ல அஞ்சு வருசத்துக்கு முன்னால வேலை செஞ்ச அம்மாவுடையதாம். ரொம்ப நேரமா யோசிச்சு அப்புறமா கண்டு பிடிச்சேன். அவங்க பொண்ணு போன் நம்பர் எங்கிட்ட இருந்துச்சு.. கால் பண்ணி இப்ப தான் பேசினேன் வீட்டுக்கு வந்ததுல இருந்து அழுதுட்டே இருக்காங்க னு அவங்க பொண்ணு சொல்லிச்சு. உங்க நம்பரை கொடுத்திருக்கேன்.

சிறிது நேரத்தில் அந்த அம்மா அழைத்தார்கள். தொலைஞ்சு  போச்சு இனி கிடைக்கதுனே நெனச்சேன் பா.. ரொம்ப நன்றிப்பா. உன் பேர் என்னப்பா ...என்றார்கள். பெயரை சொன்னதும் ' நான் சிவனுக்கு விரதம் லாம் இருப்பேன் பா அந்த விரதம் லாம் வீண் போகல. அந்த கடவுள் தான் உன் மூலமா இந்த பணத்த திரும்ப கிடைக்க வச்சிருக்கார் என உணர்ச்சி வசப் பட்டு பேசினார்கள். அம்மா ..கஷ்டப் பட்டு உழைச்ச பணம் உங்கள விட்டு போகாதும்மா.  

அந்த நல்ல பையன் சரண் அந்த அம்மா வீட்டிற்கே சென்று இதோ இப்போது தான் பர்ஸை கொடுத்து விட்டான். மீண்டும் அந்த அக்காவிடமிருந்து கால். என்னப்பா குடுத்திட்டிங்கலா.

இப்பதான் கொடுத்தோம் கா.. எல்லாம் உங்களால தான் ஆச்சு. அந்த அம்மா எனக்கு நூறு கோடி  புண்ணியம் சொன்னாங்க. ஆனா அவ்வளவும் உங்களுக்கு தான் கா என்றேன். இல்லப்பா ..உன்னால தான் இது நடந்திச்சு. அக்கானு சட்னு கூப்பிட்ட பாரு... குடும்பம் குட்டியோட சந்தோசமா இருடா என்றார்கள்.

 

ரொம்ப நன்றிக்கா..இருந்தாலும் டி எஸ் பி னு லாம் மிரட்டீடீங்க..

நிசம்மாவே டி எஸ் பி தாண்டா ..நாட்ல எவ்ளோ நடக்குது..நீயும் பாக்குற தான.. அதனால தான் அப்டி பேசிட்டேன். சாரி டா என்றார்கள்.

இரண்டு மணி நேரத்தில் எவ்வளவு ட்விஸ்ட்கள்.

நீதி : பர்ஸ் மற்றும் எளிதில் தவற விடும் பொருட்களில் சரியான தொலைபேசி எண்னை எழுதி வைக்கவும்.

 

கடைசியாக : அந்த விசிட்டிங் கார்டு பத்தி கேக்கணும் போல இருக்கவே அந்த அம்மாவின் பெண்ணிற்கு அழைத்தேன். அந்த கார்டு ல இருக்குற நம்பருக்கு தான்மா முதல்ல கால் பண்ணோம். அவர்க்கு தெரியல னு சொன்னார். அந்த கார்டு யாரோடது மா..

அதாண்ணா ..கார்டு பின்னால எதுனா எழுதி வைக்கலாம்னு அம்மா வச்சிருப்பாங்க... யாரதுனு தெரியாது னா