பிரார்த்தனை

எவரிடமும் கை ஏந்த கூடாது

எனபது உங்களின் பிரார்த்தனை.

பிரார்த்தனைப் பாடலே மேரியின்

பிச்சைப் பாத்திரம்.

கைகள் இல்லாமல்

கும்பிடுபவனின் மீது

கவனம் திரும்பாமல் பார்த்துக் கொள்கின்றீர்

கண்ணாடியின் வழியாக

ஊடுருவிப் பார்க்கின்றீர்

கண்கள் குருடா, ஏதும் தெரிகின்றதா என்று

உங்களின் ஆய்வுகள்

போலியோ சப்பிய கால்களையும்

சாட்டையால்

அடித்துக் கொள்பவனின் ரத்தத்தையும்

விட்டு வைப்பதில்லை.

கக்கத்தில் இருப்பது

குழந்தையா, பொம்மையா

என ஆய்ந்து

ஒரு ரூபாய் வர(ம்) வேண்டி

பாக்கெட்டை மேய்ந்து

தரும் ஒற்றை ரூபாயில்

தலைமுறைக்கு புண்ணியம்

சேர்க்கின்றீர்.

கைகளில் தரப்பட்ட

அல்லது திணிக்கப்பட்ட

நோட்டீஸ் தாமாக

விழுமாறு செய்ய

உங்களால் முடிகிறது.

தேடும் ஒரு ரூபாயை  

சீக்கிரம் தேடி முடியுங்கள்

இல்லையேல்  

கடவுள்கள் கடந்து விடக் கூடும்.