வீட்டில் வாழும் தேவதை

இன்னமும் பாலாவிற்கு பெட்டில் உச்சா போகும் பழக்கம் போகவில்லை. அத்தோடு மேலே தூங்கும் பழக்கமும். ஏன்டா இப்படி செய்ற, சீமக் கதை எல்லாம் பேசுற, இப்படி பெட்ல உச்சா போகலாமா என்றால், அப்பா அது உச்சா இல்லப்பா, நான் தூங்கும் போது யாரோ தண்ணிய ஊத்தி ஊத்தி விடுறாங்கப்பா! யார்னு கண்டு பிடிக்கணும் என்று அழகாக சமாளிக்கிறது . மற்றும் ஒரு நாளில் நீங்க நல்லா தூங்குனீங்க, அதனால எழுப்பலப்பா என்று சொல்லும். தூங்காமல் அழும் போது மேலே போட்டு பாட்டு பாடி தூங்க வைத்த பழக்கம் நிறுத்த முடியாமல் இன்னமும் தொடர்கின்றது. சஞ்சய் சொல்கின்றான் ‘நீ இனி பெரிய புள்ள பாலா, அப்பா மேல எல்லாம் தூங்கக் கூடாது என்று. எங்கப்பா... நான் தூங்குவேன் போடா என்கிறது. தூங்கியவுடன் பெட்டில் போட்டு விட்டு கீழே பாயில் படுத்திருந்தாலும் இரவில் எப்போதாவது எழுந்து தேடி வந்து படுத்துக் கொள்கின்றது. தலை முதல் கால் வரை இழுத்துப் போர்த்திக் கொண்டு தூங்கும் பாலா என்னை எனக்கு ஞாபகப்படுத்துகிறது.

ஆபீசில் இருக்கும் போது ஒரு நாள் பாலா கேட்டது. அப்பா நீங்க காலையிலயே வருவீங்களா இல்ல நைட்டு வருவீங்களா என்று. நான் சொன்னேன் நைட்டே வந்துருவேன் பாலா என்று. நைட்டு தான் வருவியா காலையில வர மாட்டயா என்று கேட்டு விட்டு ஒரே அழுகையாக அழ ஆரம்பித்தது. மீனா போனை வாங்கிப் பேசியது ‘ என்னங்க சொன்னீங்க புள்ள இப்படி அழுகுது.... இல்ல மீனா பாலா நைட்டு வருவீங்களா இல்ல காலையில வருவீங்களான்னு கேட்டது. நான் நைட்டே வந்துருவேன்னு சொன்னேன் அதுக்கு அழுகுது என்றேன்..

ஒங்களுக்குத் தெரியாதா, அதுக்கு வெளிச்சத்தோட வீட்டுக்கு வந்தா காலையிலனு அர்த்தம். இருட்டுன பின்னாடி வீட்டுக்கு வந்தா நைட் என்று அர்த்தம். நீங்க லெட்டா வர்றேன்னு சொன்னதால புள்ள அழுகுது என்று. அப்போது தான் எனக்குப் புரிந்தது. பாலாவின் காலக் கணக்கு. நம் மாதிரி சாதாரண மனிதர்க்குத் தான் காலை, மதியம், சாயந்தரம், இரவு என்ற காலப் பாகுபாடு எல்லாம். பாலாவிற்கு வெளிச்சம் இருந்தால் காலை இல்லாவிட்டால் இரவு என இரண்டே காலம் தான். யோசிச்சுப் பார்க்கையில் பாலாவின் கேள்வியை நான் தான் சரியாகப் புரிந்து கொள்ளவில்லை. அது காலையிலேயே வந்துடுவியா, இல்ல நைட்டுத் தான் வருவியா என கேட்டது.

இப்போது பாலா போன் செய்தால் ‘ சமத்தா அம்மா சொல்றத கேட்டுட்டு இரு பாலா , அப்பா காலையிலேயே வந்துடுவேன்.. என்கின்றேன்.

இப்பவும் சஞ்சய், அப்பா ‘அரிச்சு விடுங்கப்பா’ என்கிறான். பாலா ‘கூசுங்கப்பா’ என்கிறது’. அரிக்குது சொரிஞ்சு விடுங்க என்பதை ‘ அரிச்சு விடுங்க என்றும் கிச்சு கிச்சு மூட்டினால் ஏற்படும் கூச்சத்தை, கூசி விடுங்கள் என்றும் அகராதியில் புதிதாகச் சேர்க்க வேண்டிய சொற்களை அறிமுகப் படுத்துகிறார்கள். இன்னமும் வங்கித் தாங்க என்று சொல்லத் தெரியவில்லை. ஆங்கித் தாங்கப்பா’ என்றே கேட்கிறது.

அப்பா கதை சொல்லுங்க என்று தான் பாலா ஆரம்பிக்கும். ஆனால் நான் சொல்வதை விட பாலா கேள்வி கேட்பதே அதிகமாக இருக்கும். ஒரு ஊர்ல ஒரு ராஜா என்று தான் ஆரம்பித்திருப்பேன். பாலா கேட்கும், அந்த ராஜா என்ன கலர் ட்ரெஸ் போட்டிருந்தார். அவருக்கு எத்தன பசங்க! அவங்க வீடு குட்டி வீடா இல்ல பெருசா என்று. கதையை முடித்தவுடன் இதுலருந்து என்ன தெரியுது என்று கேட்கும் கேள்விக்கு சஞ்சய் பதிலும் பாலா பதிலும் என்றுமே ஒன்றாக இருந்ததில்லை.

அடுத்து பாலா கதை சொல்ல ஆரம்பிக்கும். ஒரு ஊர்ல ஒரு ராஜா இருந்தார். அந்த ராஜா... ‘அப்பா, இது நீங்க சொன்ன ராஜா இல்ல வேற ராஜா’ என்று ஆரம்பித்து, நான் கதையில் சொன்ன கேரக்டர்களைச் சொல்லி ஆனால் அவர்கள் இல்லை என்பதிலேயே கதை தொடரும். பின்பு எங்கெங்கோ கதை இலக்கின்றி அலையும். ராஜாவை பேய் பிடித்துக் கொள்ளும். அவர் சிங்கத்திடம் மாட்டிக் கொள்வார். மாட்டிக் கொண்ட ராஜாவை ஒரு பறவை காப்பாற்றும் என நான் லீனியர் முறையில் கதை செல்லும்.

செருப்பு அல்லது செப்பல் என எத்தனை தடவை சொன்னாலும் இன்னமும் அப்பா என்னோட ‘செருப்பலை’ பார்த்தீங்களா என்றே கேட்கும் பாலாவின் போட்டி சில சமயம் மீனாவிடமும் நீளும். ( நீ மட்டும் புது நெக்லஸ் போட்ருக்க, எனக்கும் ஆங்கிக் கொடுப்பா, இதே மாதிரி)

ஹாஸ்பிடல் கிளம்பும் போது கூட பெளடர் போட்டு பொட்டு வைத்துக் கொண்டு அப்பா நல்லா இருக்கேனா எனக் கேட்கும் பாலா தானே சோப்பு போட்டுக் கொள்வேன் என பாத் ரூமில் அடம் பிடிக்கும். அப்பா வெள்ளை சோப்பு (டவ் சோப்) வாங்கிட்டு வாப்பா.. அப்ப தானே நான் வெள்ளை ஆவேன் என்று இரண்டு தடவை மூஞ்சிக்கு சோப்பு போடுகிறது. சோப்பு போட்டு விட்டு கண்களை மூடியபடி தண்ணீர் மோக்க ஜக்கைத் தேடித் தடவும் காட்சியை விட மகிழ்ச்சியான தருணம் ‘அப்பா’ கேரக்டருக்கு வேறு எதுவும் இருக்க முடியாது. வீட்டுக்கு வாடா கத்திய வச்சி குத்தி கொல்லிடுறேன் என்று சாக்லேட் வாங்கித்தராததற்காக கோபப் படும் பாலா. ஒன்னோட வயித்துல நான் ஏறி நின்னேன்ல அதே மாதிரி என்னோட வயித்ல ஏறி நில்லு.. ம் ஏறி நில்லுடா என அதட்டும் பாலா. ஒனக்கு புது சட்ட, வீடு ஆங்கித் தர்றேன் என கண்கள் மின்ன சொல்லும் பாலா என எங்கள் வீடு முழுதும் பால சந்தியாவின் ஆட்சி தொடர்கின்றது.

இது எங்கள்  வாழ்க்கையின் பொற்காலமாக இருக்கக் கூடும்.